Mysuru, 3 July 2025: Social Democratic Party of India (SDPI) ka ek aham ijlaas party ke Mysuru District Office mein mun’aqid hua. Yeh ijlaas State General Secretary aur Election In-Charge Afsar Kodlipete ke rehnumai mein, aur State ERM In-Charge Abrar Ahmad ki sadarat mein hua. Afsar Kodlipete ne apne ibtidaai khitaab mein kaha “Aane wale local body elections party ki siyasi buniyad ko mazid mustahkam karne ke liye intehai ahem hain. Is silsile mein SDPI ke muntakhib namayindon ki zimmedari aur bhi zyada barh jaati hai. Siyasi wafadari aur sakht mehnat ke zariye, unhein is tehreek ko asal ‘Awami Ikhtiyar’ ki taraf le jaane ka qiyadi kirdar ada karna chahiye.” Abrar Ahmad ne shirkat karne walon ko muttali kiya “24 July ko Mysuru mein SDPI ke shehri local bodies ke corporators aur councillors ke liye ek rozah khas training workshop mun’aqid ki jaayegi. Iska maqsad unki salahiyat mein izafa karna aur unki performance ka jaiza lena hai.” Ijlaas ke dauran mukhtalif wards mein anjaam diye gaye taraqqiati kaamon, hukoomati skimon ke implementation, aur SDPI ke nazariyat aur mission ko awaam tak pahunchane ke liye uthaye jaane wale qadam par bhi tabsara kiya gaya. Mukhtalif azla se aaye huye District-level ERM In-charges ne is ijlaas mein purjosh hissa liya aur apne tajurbaat share kiye.

Social Democratic Party of India-Mysuru

SDPIKarnataka #Mysore