Aaj Bengaluru mein Social Democratic Party of India (SDPI) ki State Committee Member marhooma Ayesha Shabbir ki yaad mein ek taziyati program munaqid kiya gaya. Is program mein party ke mutadid zimmedaran, karkunan aur khawateen ne shirkat ki.
Is mauqe par SDPI Karnataka ke State President Abdul Majeed, State Vice President Abdul Hannan, State General Secretary Mujahid Pasha, Women India Movement ki State President Naseema Fatima, State General Secretary Nasriya Bellary, SDPI ke State Secretary Akram Maulana, Treasurer Amjad Khan, State Committee Members Ilyas Ahmed aur Advocate Waseem Ahmed, District President Javed Mohammed Azam aur Saleem Ahmed ke ilawa badi tadaad mein party ke qaideen, karkunan aur khawateen maujood the.
Marhooma Ayesha Shabbir ke ahl-e-khana ke afraad bhi is mauqe par shirkat kar rahe the. Is taziyati program mein marhooma ki khidmaat ko khiraj-e-aqeedat pesh karte hue kaha gaya: Ayesha Shabbir ek aam khatoon nahi thin. Woh ek awaaz thin, ek tehreek thin aur hausle ki alamat thin. Unhon ne Bengaluru ki sarzameen par SDPI ke platform se khawateen ko munazzam kiya, unhein bedaar kiya aur yeh ehsaas dilaya ke khawateen sirf tamashai nahi balki tabdeeli ki taqat hain. Aaj ke daur mein sach bolna aasaan nahi hai. Zulm ke khilaf kharay hona aasaan nahi hai. Aur khaas taur par ek khatoon ke liye samaji aur siyasi maidan mein dat kar kharay hona aur bhi mushkil hai. Lekin Ayesha Shabbir ne sabit kar diya ke agar hausla ho to koi deewar raasta nahi rok sakti. Woh har program mein aage rehti thin. Har jad-o-jehad mein aage rehti thin. Aur har mushkil mein karkunan ke saath khari rehti thin. Khamoshi zulm ko mazboot karti hai… Aur awaaz uthana insaaf ki pehli seedhi hai. Magar afsos, ek achanak dil ke aarze ne humein is bahadur khatoon se juda kar diya. Woh apne shohar, apne bachchon, apne saathiyon aur senkron karkunan ko gham mein chhor kar chali gayin. Unke jane se sirf ek ghar khaali nahi hua, balke siyasi tehreek ka ek mazboot sutoon hum se juda ho gaya. Badi shakhsiyatain marti nahi hain. Unki soch zinda rehti hai. Unka paigham zinda rehta hai.
Unki jad-o-jehad zinda rehti hai. Ayesha Shabbir aaj hamare darmiyan jismani taur par maujood nahi hain, lekin unka hausla, unki awaaz aur unki jad-o-jehad aaj bhi hamare darmiyan zinda hai. Asal khiraj-e-aqeedat yeh hoga ke hum unke mission ko aage barhayen, khawateen ko mazeed munazzam karein aur insaaf ki is jad-o-jehad ko jari rakhein. Allah Ta’ala marhooma Ayesha Shabbir ko Jannat-ul-Firdous mein aala maqam ata farmaye, unki khidmaat ko qubool farmaye aur unke ahl-e-khana ko sabr-e-jameel ata farmaye. Kuch log zindagi guzar kar chale jate hain… aur kuch log tareekh bana kar chale jate hain Ayesha Shabbir un logon mein se thin jinhon ne tareekh mein apna naqsh chhor diya.
SDPI KARNATAKA
Social Democratic Party of India
